المساعد الشخصي الرقمي

مشاهدة النسخة كاملة : الشعر الحماسي


Omer Ahmed Hamza
02-18-2011, 01:23 PM
كسار قلم ماكميك

ماكميك هو السير هيرالد ماكمايكل والذي ولد في سنة 1882 وتوفى سنة 1969 وهو ادارى بريطاني تخرج في كمبردج وبعد تخرجه التحق بالخدمة المدنية لبريطانيا حيث عمل بالسودان الانجليزي المصري وقتها إداريا في النيل الأزرق سنة 1915 وبعدها كبير المفتشين بالخرطوم ووصل إلى قمة السلك الادارى حيث شغل منصب السكرتير الادارى في السودان سنة 1926 أما كسار قلم ماكميك فهو الشيخ عبدالله ود جادالله ناظر الكواهله وهو جد السيد الصادق المهدي لامه حيث تزوج السيد الصديق المهدي الرحمة بنت عبدالله ود جاد الله ... وكانت نظارة عبدالله ود جادالله تسيطر على المنطقة بين النيلين حتى الشكابه وانقسمت بعد ذلك إلى ثلاث قطاعات وهى نظارة عبدالله ود شاع الدين ونظارة هبانى في نعيمه ونظارة أولاد زايد ما بعد الحوش حتى الفاو .. أما الشقيق والتي كانت تقع فيها نظارة عبدالله ود جادالله فتقع في الجزء الشمالي الغربي من ولاية النيل الأبيض يحدها من الشمال قوز ود حمارى ومن الشرق قرية السيال إلى حدود قرية الشيخ الحسين وما جاورها ومن الجنوب قرية المراخه وغربا قرية المقيرينات الى حدود منطقة الهلبه ،وتقطن هذه المنطقة قبيلة الكواهله و الجعليين والماجدية والحسانية وبعضا من الجموعية قليل من القبائل الأخرى.. وتتكون منطقة الشقيق من عدة قرى تزيد عن 35 قرية .

تزوج الإمام محمد احمد المهدي فاطمة بنت الحسين الحجازية من الشوال وأنجبت له أم سلمه والتي تزوجها عبدالله ود جادالله كسار قلم ماكميك وأنجب منها ابنته رحمة والتي تزوجها السيد الصديق المهدي وأنجبت له السيد الصادق المهدي ،اى ان كسار قلم ماكميك هو جد السيد الصادق المهدى لامه.
قصة أغنية كسار قلم ماكميك إن عبد الله ود جادالله اختلف مع ماكمايكل في بعض الأمور الاداريه فهدده ماكمايكل بكتابة تقرير عنه فامسك عبدالله ود جادالله بقلم ماكمايكل الخشبي وكسره ورماه ، فلقب عبد الله ود جاد الله بكسار قلم ماكميك وسميت نظارته بنظارة كسار قلم ماكميك ، ولقد أدت هذه الحادثة فيما بعد إلى تحويل النظارة من أسرة عبدالله ود جاد الله إلى أسرة الاعيسر وهم أبناء عمومته
ولقد ذكر الأستاذ خالد الشيح حاج محمود إن شاعرة هذه الأغنية هي مستورة بنت كوكو وهى من الشقيق وهى كاهلية ولقد غنت هذه الأغنية أم بارود والرحمة مكي وتغنى بها وسجلها للإذاعة الفنان الكبير بادي محمد الطيب له الرحمة والمغفرة .
كسار قلم ماكميك

عليك بجر النم يا دقر الحرائق
أصبحت كاتم السم عشميق الأصم
********
شدولو ركب فوق اصهبا وحشي
رايو مكملو وكلامو ما هبشي
اديتكم أمانه متقنعه وتمشى
عاشقانى الامانه ضيف الهجعه يتعشى
ما بتطاقش الهسوق وما بطاقشو الهسوق ولدا قبيل منسي
علكيكا كبير ماكميك جنى هكسى
*********
الليله البلد اتباشرو ناسو
يا بحر المحيط مين عبرو وقاسو
بريطانيا والترك ما لينو ساسو
والعضم الكبير كسرو وشرب ساسو
********
شدولو ركب فوق اصهبا مو ربيك
والهوى والشرق شرفا بعاينن ليك
العاقر تقول بلدى وبسمي عليك
يا عيد الضحية البفتحولو البيت
رايو مكملو وكسار قلم ماكميك
عمر احمد حمزه الكاهلي /عسير

Omer Ahmed Hamza
02-19-2011, 07:40 PM
بسم الله الرحمن الرحيم
ما بين موسي ود جلي ويوسف سنينات
أصاب المحل بنو جرار ورحلوا من غرب السودان لشرق السودان ووصلوا ديار الشكرية واستأذنوا الشكرية لجوارهم في البطانة ، الشكرية من عاداتهم رحبوا بضيوفهم من بني جرار وأعطوهم المرعى والحفاير وأكرموهم ، ثم بعد فترة قصيرة تهاوش الرعاة فيما بينهم رعاة الشكرية كسروا ناقة من نوق بني جرار أتت أخت موسى ود جلى وهو زعيم قبيلة بني جرار وقالت لأخيها موسى لازم بدل الناقة تجيب لي آمنة زوجة يوسف سنينات زعيم الشكرية موسى نفذ كلام أخته ثم بدأت المشاكل .

موسى : سلام عليكم يا أهلنا يا البيكم تطيب أيامنا وتتهنا
يا منزل ضيوف الليل داب ما جنّ
ألبل حافلات واليوم علينا تشنا
وضاق بينا الأمر والليلة جينا رحلنا
يوسف : حباب العم جلي حبابو
حباب الفي بني جرار عزيز أنسابو
عرباً ريسوك والله قط ما خابو
تعال يا قدار جيب عشرة بكار
لا ضاقن قيد لا ضاقن عشار كرماً لي بني جرار
شمة أخت موسى :
خاف العريب قلبهم غشاهم
كيف إطردوا نعامنا واسقوا حشاهم
إن ما جبت لي آمنة وحرقت حشاهم
ما بقول أولاد جلي وبفشاهم

موسى جاء لآمنة ووجد المشاطة تمشط فيها وقال ليها آمنة أنا داير أسوقك وفعلاً موسى ساق آمنة .

مشاطة آمنة : يوم جيت لقيت سيد المنفلا غايب
وشفت أم برعة تبكي وإنت خاطرك طايب
كان جاء سيدي اللي سيفو ما يكوسولو ضرايب
كان حصل القدر أم الصبي والشايب
( لمن جاء أبو آمنة وجدها ساقوها رجع للشكرية قالوا ليهم )
يا شكرية جاتكم نادرة
كيف ترضوها
بنو جرار جووا ساقوا آمنة المفردهة دوبها
زوجة يوسف الحكم العرب والنوبة

ناس الحلة خرجوا بعصيهم وسيوفهم وطاردوا آمنة

موسى : آمنة فزعك لمة
آمنة : ما تعجبك العريب والدردشة المنخمة
وما بصدوني منك يا نقيع السمة
كان جاء البسر بالي وبفش الغمة
كان حصل القدر
الليلة يا موسى يومك تم

قدار راح يودي الخبر ليوسف سنينات وقال ليهو بني جرار ساقوا آمنة ساقها موسى ود جلي

يوسف : شوف قدار ولدي وشوف مشني كلامو
وجاب لي خبراً شين قبال إتم لي سلامو
سواها وأنا علي نجامو
أنا يوسف سنينات
دود الخلا النتات
بعد السمتة دي طاري بنات
يوسف ركب يجيب آمنة
يوسف : قدار ولدي حرم تقيف بي قفاي
وتفكر للعريب هسع تشوف جراي
موسى شاف الحصانين حصان يوسف وحصان تانى قال :
موسى : دق التور أنا الجدري النضير الما بتم الدور
أنا الحاكم سلاطين برقو وسلاطين فور
آمنة عرفت إنو موسى إتلخم قالت ليهو
آمنة : مهلاً مهلاً يا موسى أعصرك بالركاب أخليك كذا الناموسة
راجل أمك حصل هسع لحست الخوسة

يوسف لم في موسى وقتل ناسو موسى لمن شاف ناسو ماتوا بعدها تلب من حصانو وقال لي يوسف تصلني يوسف قال ليهو إنت ضو قبيلة وأنا الضو في البيت ما بكتلو بتكتلوا المرأة استسلم موسى ونزل من حصانو ودعا يوسف لزيارة الفريق وترك آمنة في ظل شجرة وفات بي حصانو وقال لآمنة :

يوسف : أنا البهابني الشيطان ويصيبني الدابي
أنا إن ما جبتك كيف أتكلم وابرم أشنابي
موسى قال لأهله لمن وصل فريق بني جرار
موسى : يوسف في قلوبنا دخلت خيفتو
جلي : كشفولو الحريم وتممولو وظيفتو
أهل موسى غضبوا أبو موسى قال لولده
جلي : أنا جلي أهلي الكبار سمتني
الليلة يا صب الحديد بتجيني متني
أم موسى : أقطع شطري وأديهو الكلب
الليلة يا صب الحديد بتابى الضرب
أخت موسى : لا ضربوك ولا لقيتك في المحاص متوفي
الليلة إطردك الشكري وتجيني مقفي
اتلفت يوسف علي عبده
يوسف : يا قدار ولدي الكلام كيفنو
قدار : كيفن يا الطاوي خمسين فن
بتجوز تكتلو والحريم كشفنلو
موسى مو عارف الحريم والدات ضكور وأناتي
المتلكن عندي حرم تتقنعن يا بناتي
عمر احمد حمزه الكاهلي /عسير

احمد بن فؤاد القرشي
02-19-2011, 08:47 PM
شكرا على هذا الثراء الثقافي المميز جدا

الغالي عمر احمد حمزه بن الكواهله الاصيل
متميز بقلمك وبوجودك وبهمتك دائما
والله لانت فخر للكواهله

دمت في حفظ الله

Omer Ahmed Hamza
02-20-2011, 10:43 AM
بسم الله الرحمن الرحيم
(الطيب وموسي والبخيت وعبد الدائم)


من القصائد الحماسية والتي اشتهرت وذاع صيتها قصيده ما حرسو الجري وقصيده أنا ليهم بجر كلام وشاعرة هاتين القصيدتين هي زينب بنت عبدالرحمن من منطقة الجزيره أم مغد ولقد قالت هذه القصائد في إخوانها و إن إخوانها عددهم سبعة ولقد ذكرت أسماء بعضهم في هذه القصايد وهم ( الطيب وموسى والبخيت وعبدالدائم ) ولقد اختصرت قصيده ما حرسو الجري على البخيت ولكنها أشارت إلى إخوانه في القصيدة قائلة ..

ماحضروا معاك أخوانك السلاط
قمزوا الخت علي خيلاً بجن غايرات
بدخل فوق بكانن حرابو منشبكات
جاء مرهون علي جفونو الدمي سايلات

وماحضروا معاك أخوانك الديدان
قمزوا الخد علي خيلاً بجن رِيقان
وكت الشوف أشوف صدرك يزم دلهان
سوالَُن جهاد حمزة وعلي وعثمان

اما الطيب فلقد قالت فيه في قصيده انا ليهم بجر كلام ..
سم الدرق البصقع جدري القيعه البفقع
والله صوتك مانع بردع الطيب في شطارتو مبدع

اما موسى فلقد كان نصيبه من القصيدة ...

سم الدرق الجدادى تكل الجدري البعادى
للخصيم ضربو بياذى موسى المر الحجازي

ولقد قالت زينب بنت عبدالرحمن في عبدالدائم .....

وعبدالدائم شقا سيرو من ولدوهو الشكره هيلو
الخصيم ما بكيلوا صوتوا بهجل قبيلو

عبدالدائم معاه اخوانو طافو البلاء في مكانو
خصوموه قنعوا قامو الصف الواقف قدامو هو مستعد للطامو


أنا ليهم بجر كلام دخلوها وصقيرها حام

سم أب درق البصقع جدري القيعه البفقع
والله صوتك مانع بردع الطيب في شطارتو مبدع

سم أب درق الجدادى تكل الجدري البعادى
للخصيم ضربو بياذى موسى المر الحجازي

قرقر ملى للوسادة برنو وشال لي مكاده
ديل جنيات الندادة سيدي الدار في السياده

قرقر فوق للدرب وربط الهوى والشرق
كدي مابزولنا الضرب ديل جنياتنا ما بتنغلب

والله عامر سوقك مبدر مجرجر توبك مسبل
الطيب للشر مبدر مو التكل المجدر

أنا نميت جبتا قلبو فشلو القالوا قصو دربو
ديل رازوهو وشافوا ضربوا دق السنداله قلبو

وعبدالدائم شقا سيرو من ولدوهو الشكره هيلو
الخصيم ما بكيلوا صوتوا بهجل قبيلو

عبدالدائم معاه اخوانو طافو البلاء في مكانو
خصوموه قنعوا قامو الصف الواقف قدامو هو مستعد للطامو

أنا نميت جبت غناكم يا الزينين هوى براكم
البدوركم تراكم حلق الطير لي غداكم
الصف العامر رجاكم
اتباشروا لي بلاكم واركزو زينب وراكم

جروا لي مره صوتكم ويروني الليله صوتكم
اتباشرو الله فوقكم
عمر احمد حمزه الكاهلي /الجزيره /عسير

Omer Ahmed Hamza
02-20-2011, 12:20 PM
بسم الله الرحمن الرحيم
الاخ الزعيم احمدالقرشي سلاااااااااام
لقد اشتهر الشعب السوداني بالحماس والفراسه فكانت بطولاتهم تمثل تاريخ السودان وهذا الارث في البطوله قد وثقه الاخ الدكتور احمد القرشي في ارشيف (اغاني الحماسه والسيره) متعه الله بالصحه والعافيه وهذا جزء يسير منه والهدف ان نعكس الصوره البطوليه لابطالنا وفرساننا لانهم صارو اسماء في حياتنا
عمر احمد حمزه الكاهلي/ عسير

Omer Ahmed Hamza
02-20-2011, 10:45 PM
بسم الله الرحمن الرحيم
عبد القادر ود حبوبه


الاسم الكامل لود حبوبه عبدالقادر محمد إمام إدريس . ولقد كان والده ناظرا للحلاويين في أواخر العهد التركي . ولد ود حبوبه في قرية قوز عبدالسلام ولقد كان شابا قويا محبا للخير كارها للظلم تعرف ود حبوبه بالإمام المهدي بقرية طيبة الشيخ القرشي وعندما قامت الثورة المهدية كان عبدالقادر من مؤيديها ومناصريها ، ولقد شارك في كل معارك المهدية ما عدا معركة كرري، وبعد موقعة كرري عاد ود حبوبه إلى منطقة الحلاويين . وكان عبدالقادر ونفر من أصحابه يجوبون المناطق المختلفة يسمعون الناس قصائدهم التي يمدحون فيها الرسول (ص) والإمام المهدي ويتلون القران .. واعتبر الانجليز هذا تحريضا من ود حبوبه وبداية لثورة مهدية جديدة... ولقد كانت بداية الثورة في التقر حيث قتل عبدالقادر المفتش مستر س . سكوت منكريف والمأمور واليوزباشي محمد شريف وكان ذلك في 29/4/1908

لقد جرت محاكمة عبدا لقادر ود حبوبه في الكاملين يوم 7 مايو 1908 أمام قاضى محكمة المديرية المستر بيكوك القاضي المدني. فأثبتت عليه المحكمة جريمة قتل مستر منكريف أسكوت المفتش الإنجليزي برئاسة مديرية النيل الأزرق واليوزباشي محمد شريف مأمور المسلمية وجريمة فتنة وإثارة الحرب على حكومة السودان ، وحكمت عليه المحكمة بالإعدام ومصادرة أملاكه . وقد نفذ فيه حكم الإعدام صباح الأحد الموافق 17 مايو1908 بسوق حلة مصطفى حيث كان يقام سوق الحلاوين في ذلك الوقت ، و في يوم شنقه احضر ود حبوبه مكبلا بالحديد وقبل أن يشنق ودع أهله وأقربائه دون خوف أو وجل حيث كان ثابت القلب قوى العزيمة شجاعا بطلا لا يخاف الموت ولا يهابه ، صعد إلى المشنقة وهو يهلل ويكبر ومن حوله النساء يزغردن لهذه الرجولة والشجاعة والفروسية ولقد هزّ هذا المشهد المستعمر هزا عنيفا لأنهم لم يروا شجاعة كشجاعة ودحبوبه ، ولقد دفن جثمانه الطاهر بالقرب من منطقة الحلاويين ولقد ذُكر إن ود حبوبه عندما منح فرصة ليطلب مايريد قال ان طلبه هو تسليم ملابسه بعد إعدامه لبنات عمه ليتأكدن انه لم يخاف أو يرجف أو يتبرز في ملابسه كما يفعل الكثير عند إعدامهم وبالفعل كان نظيفا فانطلقت الزغاريد من نساء الحلاويين .
بتريد اللطام هي القصيده التي قالتها اخته رقيه


بتريد اللطام أسد الكداد الزام
هزيت البلد من اليمن للشام
سيفك للفقر قلام

ديّم في التقر انصارو منزربين
بالصفا واليقين حقيقة أنصار دين
بالحرب أم طبائق قابلوا المرتيين
في وش المكن رقدوا التقول نايمين

ديّم في التقر انصارو زاربنو
بعهدوا القبيل بعيسى تاهمنوا
اتلموا العمد ليهم نقر سنوا
الهوج والشرق طار المنام منوا

ديّم في التقر قال العمير للسوم
القوى والضعيف من عينو طار النوم
الكفرة النجوس مابختوا من اللوم
حجرت الدرب خليت جمالهم تحوم

الأسد النتر وقال الدين منصور
لمولوا الاورط جابوهم بالبابور
العمد الكبار كلامهم بقى مدحور
كم فقشت مدير وكرمت بالمأمور

الأسد النتر بى جيهة الأبقار
لمولو الاورط شايلين سلاح النار
ود حبوبة قام ورتب الأنصار
في كتفيه ديك كم شبعن صقار

الإعلان صدر واتلمت المخلوق
بى عيني بشوف أب رسوة طامح فوق
كان جات بالمراد واليمين مطلوق
ما كان بنشنق ود أب كريق في السوق

الإعلان صدر واتلمت الحلال
نصبولو السلاح واتكرنف الخيال
قدر الله الحصل و الزمان ميال
منسول من أبوك ماك ود حرام دجال

بتكلم بقول بوريك شن حسبوا
نايبو السنين منّو الرجال حسبو
كل الخاصموك في الآخرة ما كسبوا
التبعوك جنود لله ما انتسبوا

رضوان الإله تملأ الضريح كافور
مسك الرحمه لاح منو يلوح النور
اغفر سيئات كل من يجيك زور
في الفردوس هناك يتمنى مهما يدور
عمر احمد حمزه الكاهلي /الجزيره /عسير

alarbab doba
02-20-2011, 11:27 PM
الفاضل عمر أحمد حمزة كم هو جميل ما كتبت وهذا ما عرفانك به وانت أهلٌ له وهذا قليلا من كثير من فيضكم وانا شاكراً جداً لكم تواصلكم المستديم بالشبكة وخارجها فحفظك الله بقدر ما قدمت وتقدم . وجعل قلمك نبراساً يُضيء لنا الطريق في هذه الشبكة .

Omer Ahmed Hamza
02-21-2011, 09:53 AM
بسم الله الرحمن الرحيم
الاربااااااااااااااااااب الف حمدا لله علي السلامه والله لك شوق لمشاركاتك ووجودك في المنتدي عليييييييييييك الله ما تطول الغياب والف شكر علي المرور
عمر احمد حمزه الكاهلي/عسير

Omer Ahmed Hamza
02-21-2011, 04:05 PM
بسم الله الرحمن الرحيم
النعيم ود حمد


قصيدة النعيم ود حمد من كلمات رجل اسمه بابا ، وكان النعيم عمدة للمعيلق
بعد مدح بابا للنعيم غضب أهل بابا نسبة لبعض الخلافات بينهم والنعيم ود حمد فاشتكى أهله للشيخ الجيلى ود العباس ود بدر ناظر الخط الخامس جهة الكاملين فقال الشيخ الجيلى لأهله ( انا بابا دا وسمتو وطلعتو) فمدح بابا الشيخ الجيلى ود الشيخ العباس ود بدر بقصيدة ( البشيل فوق الدبر ما بكل ) قصيدة النعيم ودحمد تغنى بها خلف الله حمد ومبارك حسن بركات وثنائي الدبيبه
النعيم ودحمد



يا الأحييت سنن البرامكه
وعاجبني طول ايده سامكه
يا يابا قول النعيم درّاج المتابكة

النعيم يا فحل القبائل
كريم لمام الهمايل
شيتا براك ما أظنو خايل
ايدو أم ِرويق والقِبلي شايل

النعيم يا قاصدين لبا
خشمو انطبع لي مرحبا
هو عزيمتو ما بردخا
والبتسبل للضيف بضبحا

النعيم قادل وحدو
ما تكترو وتتقعدو
هو رب القدرة ساعدو
ختو لو الصحة ما فنتدو

غنيت لدابي الرجيمة
ما بحوى على البهيمة
هولك الشكرات قديمة
ما بشيل المال الفي القسيمة

أنا غنيت للولد
الاسمو النعيم ود حمد
وكت العيش ِبقى بالقبض
ديوان النعيم ولا بنسد (انت الكبرى الركز البلد )

غنت ليك أم رشوم
هو مو لها وطق خُشوم
وكت العيش بقى معدوم
فوق ضهرو الولية تنوم

النعيم الشكر ليهو ُقلتو
بسبل بتوب سترتو
زي القمر في ُبهرتو
باجور شخرت ماسورتو

يا الشرفت القضا
ويا الحاكيت من مكوار بدا
خدامتو القعدا
هيِ بتدرِش قالت قضى

انا غنيت جبت وصفو
مكتوب الشرف على كتفو
ناطو ليه ما لحقو حرفُو
ديل القبيل ماكلنو حرفو

عمر احمد حمزه الكاهلي/ الجزيرة /عسير

Omer Ahmed Hamza
02-22-2011, 11:34 AM
بسم الله الرحمن الرحيم
الامين ود مسمار (نمر العبدلاب)1

الوافر ضراعو

شاعرة قصيدة الوافر ضراعو هي الهويدة وهى من مناطق سنار ، و إن الهويدة يطلق عليها الرحمة أيضا . ولقد قالت القصيدة في اخوها الأمين ود مسمار ولقد سمته نمر العبدلاب، ولقد تغنت بهذه الأغنية الرحمة مكي وكذلك مهله العبادية كما تغنى بها بادي محمد الطيب ومبارك حسن بركات والفنان الكبير إبراهيم عوض
الوافر ضراعو



الوافر ضراعو أمنتو الرسول
مأمون الوداعه برد دار أبوه

غنى يا الهويده
لود البها وجريت القصيدة
شال الصوت عرض تاية أخوى فريدة
يا جنيات انصرفو ميزة أخوى بعيدة

تغنى الفى جرفو
لود البها والخلوق بتعرفو
شال الصوت عرض يا جنيات انصرفو
نمر العبدلاب الما بيرجف كتفو

غنى يا سلكوكه
جر النم عليه وخنقى الدلوكه
انت يا الأصم يا الما بحمسوكا
يا ضرب يومين تنزل فوق عدوكا

تغنى الرحمه قالت
يا قشاش دموعي العلى سالت
وقت الحاره جات والفرسان ان جالت
نادولى الحسن تومى الحرابه دارت

فهمك مو دراسه
يالنيل الطمح كسر التُّراسه
وقت الصيح وقع والفرسان تتواسى
برد دار ابوك تضرع ضحى وناسا

فهمك مو قليل
يالهامه اب زنود فى السموم تقيل
يا رحل الكحل بالشضاض تميل
جيت يا خيرنا قش دمعى المسيل

عمر احمد حمزه الكاهلي/ عسير

Omer Ahmed Hamza
02-22-2011, 12:24 PM
بسم الله الرحمن الرحيم

الامين ود مسمار (نمر العبدلاب)2

قصيدة الآلاف درجن قيلت في الشيخ الأمين ود مسمار ولقد الفتها رقية أخت الشيخ الأمين عندما انتصر في واقعة الهلالية في الجزيره والتي كانت بين الهمج والعبدلاب ويقال إن الشيخ الأمين هوى بسيفه على أبكر بن وحش( احد كبار الفونج والذي أوكل إليه ناصر ابن محمد أبى اللكيلك قيادة الجيش الذي عبر النيل إلى الهلالية) فشطره نصفين وحام به فرسه بهذه الصورة المروعة فكان ذلك من أسباب الرعب الذي ملأ قلوب الأعداء ولقد صورت لنا الشاعرة هذه الواقعة حيث قالت ...

من قومة الجهل ما خوفوك باخ
تور بقر الجواميس الرقادن لخ
نقروبو أم هبك الدرباخنه تضخ
قرنك بفتح الهامه وبمرق المخ

، فحاقت بالهمج أبشع هزيمة وإن الشيخ رجب ابن الشيخ محمد أبى اللكيلك احد وزراء الفونج أرسل أخاه ناصر إلى الجزيرة ومعه نحو 700 فارس لمحاربة الشيخ الأمين الذي كان مقيما بالهلالية ولم يكن مع الشيخ الأمين حين مقابلته لهم إلا 16 فارسا من أولاده وعبيده ولقد ذكرت لنا رقية بنت مسمار هذا العدد في قصيدتها قائلة ...


الآلاف درجن ولدا نجيض ماك ني
البجرجر فى ام صقير وحدي

غنى وشكري يا اختو يا ريا
تمساح الكوانى الضارب الليه
سمعنالن خبرا في الهلالية
خمستاشر جواد سكن سبعمائة

من قومة الجهل ما خوفوك باخ
تور بقر الجواميس الرقادن لخ
نقرولو أم هبك الضربخانه يدخ
قرنك بفتح الهامه وبمرق المخ

أنا قولي ليك صحيح
ياركاب على شلق بنات الريح
ياجدرى النزيله الدم كرف في القيح
ادر صاقعة التلوي المقابله السيح

ما بحركو الكشكيش
والقلب ان رجف ما بنفع الحريش
الجنيات براك في الحلة آفة عيش
ود المقدره البيعزم على المافيش

عمر احمد حمزه الكاهلي / الجزيره /عسير

Omer Ahmed Hamza
02-22-2011, 11:18 PM
بسم الله الرحمن الرحيم

الشيخ ود بدر
قصيدة الشيخ سيرو شاعرتها هي أم برعه والدة الشاعر عباس عبدالملك ولقد قالت القصيدة في زواج الشيخ بن الخليفة احمد بن الشيخ ود بدر.. ولقد تغنى بالقصيدة خلف الله حمد ومبارك حسن بركات وعبدالكريم الكابلى ورمضان زايد .والشيخ العبيد ود بدر وامه ريا بت ابو زيد اخت عوض ود ابو زيد وهو من زعماء الكواهله وكان امير في المهديه والشيخ العبيد ودبدر يكني العبيد ود ريا لامه الكاهليه ومسيده في ام ضوا بان

الشيخ سيرو

النصيح جديدو
البريد الشيخ
أنا يا ناس بريدو

غنت ليك السرارا
ود العز والقهارا
ود البدقو النقارا
عينك حمرا وشرارا
حاجبك فيه انصرارا
قلبك فيهو المرارا
صدرك فيه انكرارا
دخل البقعه جالا
وكمل قماش النصارا

غنت ليك أم ضمير
قالت الشيخ وارث كثير
تلات ألاف صنف البقير
تلات ألاف صنف البعير
تلات ألاف درجن صغير
تلات ألاف وردن حفير
تلات ألاف فوق في المقيل
تلات ألاف شايلات حرير
لاك عمدة ولاك مدير
دا الفتح المن الكبير

غنت ليك أم رسا
للعريان طبق الكسا
تلا أرادب عشا
تلا أرادب عشا
متحكر لعبادة العشا
عبدالكريم ترك النسا
يا ولادة الصفا
العتق الدم بالعصا

عمر احمد حمزه الكاهلي /عسير

Omer Ahmed Hamza
02-22-2011, 11:52 PM
بسم الله الرحمن الرخيم

(الشيخ ود بدر) 2

قصيده البشيل فوق الدبر هو بابا ( شاعر قصيدة النعيم ود حمد )
ويقال انه بعد مدح بابا للنعيم ود حمد غضب أهل بابا نسبة لبعض الخلافات بينهم والنعيم ود حمد فاشتكى أهله للشيخ الجيلى ود العباس ود بدر ناظر الخط الخامس جهة الكاملين فقال الشيخ الجيلى لأهله ( انا بابا دا وسمتو وطلعتو) فمدح بابا الشيخ الجيلى ود الشيخ العباس ود بدر

بقصيدة ( البشيل فوق الدبر ما بكل )... وذكر بعض المهتمين إن شاعرة القصيده امرأة من شرق النيل مدحت بها الطيب ود العبيد ود بدر... ولقد ذُكر اسم الطيب في القصيدة
البشيل فوق الدبر

البشيل فوق الدبر ما بكل
قدل شيخى للرباع مهيل

يا ناير الخوده
يا سرالرمى يا مكمل الجوده
الحاره أم دمى أنا شيخي دا بخوده
الجبل المغور حكار للدوده

ساقية ابوى طنت
تيرانك طرابه وقيره بتقنت
غنيلك ضحى والبشاقره تتصنت

سيدي وسيد السارحه بقيده
سيدي وسيد الساويه بوليده
سيدي وسيد الجديه بورهيده
كم جلسن دقون الطيب بفيده

غنى وشكريه الليله يا بنيه
ترمبيلو الملك بيتو الماهو عاريه
طاحونتو البتدور الماه مكريه
ايدك المطره الرعدت ودودت وصبت نهاريه

عمر احمد حمزه الكاهلي /عسير

Omer Ahmed Hamza
02-23-2011, 07:32 PM
بسم الله الرحمن الرحيم

الجنيات يا بغارة

كلمات الشاعر / عمر البنا



الجنيات يا بغاره شدو خيلهم للمغاره

أخوى ما برضى الحقاره
هزّ وعرض في النقاره
في العركه الحلقن صقاره
كتل القوم يتم صغاره

يا الجنيات يا الربحتو
كيف امسيتو وصبحتو
سيف أخوى في لفحتو
بشيل الرأس بى صفحتو

عاجبنى وشكره جبتو
ما بخون جارتو وقريبتو
يا ناس بوريكم عجيبتو
للضيفان بضبح وجيبتو

داك كوراك في الحرازه
مرقو الناس للبرازه
أخوك يا جدية العزازه
سام الروح والشكره حازه

يوم العركه الفى سماحه
اشتبكو سيوفها ورماحها
برز اخوك يا أم سماحه
والخيل صداهن قماحه

أب قلبا فيه الحراره
أب عينا حمرا وشراره
يدخل الحاره ويطفئ ناره
ويشبع الصقار مراره

عمر احمد حمزه الكاهلي/عسير

Omer Ahmed Hamza
02-23-2011, 07:39 PM
بسم الله الرحمن الرحيم

الفينا مشهودة

كلمات الشاعر / محمد على ابو قطاطي


الفينا مشهودة عارفانا المكارم أنحنا بنقودا
والحارة بنخوضا

الزول بفتخر ويباهي بالعندو
نحن أسياد شهامة والكرم جندو
ما في وسطنا واحداً ما انكرب زندو
البعجز اقع بيناتنا بنسندو
الحاره بنخوضا

ركابين عليهو الناصع أب غرة
نتباشر وقت نلقى الكلام حرة
ما بننفز يمين إن متنا فد مرة
الخواف دا ما حر منو نتبرا
الحاره بنخوضا

للجار والصديق عشرتنا تتمنى
بنصون الأمانة السيدا أمنا
المغرور ندوسو ونعدموا الطنة
شافعنا بيراى الموت في الركاب سنة

عمر احمد حمزه الكاهلي /الجزيره/عسير

Omer Ahmed Hamza
02-24-2011, 01:29 PM
بسم الله الرحمن الرحيم

عبد القادر ود حبوبه 2

قصيده الواعي ما بوصو من كلمات بت مسيمس وهى حكامة وشاعرة ولقد عاصرت ود حبوبه وثورته واسمها الحقيقي رقية أيضا وهى من منطقة المسلمية .. وهنالك ثلاث نصوص لهذه القصيده وتختلف هذه النصوص عن بعضها البعض قليلا
النص الاول

الواعي ما بوصو
كلمات بت مسيمس
روايه الفنان بادي محمد الطيب

الواعي ما بوصو
من أمس الضحى
تورى أب زنود ساقو
يا مقنع ولياتو

تور بقر الجواميس العليك الرك
يا عقد الحديد للحلبي ما بتنفك
تورك يا أم رشوم في الحلق عشرق
دقيت الجسر وحاجر مشارع الحق

غنيت وجبت مسدار
المكنه بتكاكى وجنن مدافع النار
لفوك يا رحل الكحل دلوك ما بتندار
أمانة يا صقر ما تفرشت ليك برجال

غنيت وجبت نمك
بجر القول عليك يا مقنع الكاشفات
أسد الخلا الحجر اليويات
ساقوك لي الشنق
يا أبو أمنه حوبتك جات

غنى وشكري يا خضرة الجٌم
طلع لي عشارى الليله مسكو يفوح
ما خطف البدينقه وما جفل مجروح
سيفو بياخد الخوده ومعاها الروح

أمك ولدتك ما ولدتم أتنين
تسلم لي يا تلبى البكيل العين
حالف يمين ما بكون بين البين
دقيت الجسر لي متعة الحيين

غنيلو يا بنيه
من قومة الجهل ما قاملو بى نيه
وكت الشوف أشوف وقفولو سلطيه
تعدى وركز قال اخوكى يا رقيه

عمر احمد حمزه الكاهلي/ عسير

Omer Ahmed Hamza
02-24-2011, 01:34 PM
بسم الله الرحمن الرحيم
عبد القادر ود حبوبه 3

الواعي ما بوصوه

شاعرتها بت مسيمس
رواية ثانية لكلمات القصيدة


الواعي ما بوصوه من أمس الضحى
تورى أب قرون ساقوه يا مقنع ولياتو
الواعي ما بوصوه الفتح الدرب خلى العريب يمشوه

غنيت بجيب مسدار
المكنه بتكاكى جنك مدافع النار
يا قصر الرجال اللي الفقر عصار
يا قصر الفراسه اللي الضلع كسار
يا نار الزبل الما بندركلك حال
يا رحل الكحل لا بتنزاح ولا بتندار
عوج الطنضبه الما بتعدلو النار
درعولو أم خريز العسكر الزنهار
مأمن بالقماحه اتقدلت ليك برجال

الليله عليك غنيت
بلع الألف كلو قال ولا استكفيت
يوم جوك للحرب لا سخيت ولا ضليت
صامت بالقماحه أتفرشت واتغطيت
دا تور الجواميس العليهو الرك
دا عقد الحديد لى الحلبى ما بنفك
دا سم الغدور الفى الحلق عشرق
منو غيرك دق فى الحراجه مدافع الحق

الليله عليك غنيت يا مطرق الجراح
قلت ليهم عشارى مسكو يفوح
ما ختف البدينقا وما جفل مجروح
بلع الألف كلو درب الجبين مطروح
جابوك بى أم خريز الزدخانه تفوح
سيفك بشيل الفقر ومعاها ملاح المخ

من كوجه وكجيج لي عند بلاد العين
جابونا الضحى في مركز الكامنين
الأهبل يقول أدوه عشره سنين
والعاقل يقول حكموا عليهو بسنتين
وكتا جانا الجنا الطبق الجنيه في أتنين
كملت العمد والمشايخه وحلانين

ابشر يا صقر ما تكتر الحلقان
تأكل ليك مطايبا ما لحم سخلان
تأكل في المطايب ما لحم عيران
تأكل في المطايب فوق ضهر سلطان
تتغدى وتفوت كبده وكلا ومصران
شن منك نقول لامات عقيد مرجان

تكلم يا لساني تكلم المنطوق
عن مدافع الحق الفى مشيها بروق
قال قاسم اليمين كان اليمين مطلوق
زى كاسر الأسود ما بشنقوه في السوق

عمر احمد حمزه الكاهلي /عسير

Omer Ahmed Hamza
02-25-2011, 09:43 AM
بسم الله الرحمن الرحيم

الفارس الجحجاح


كلمات الشاعر /..عمر الحسين
غناء الفنان / سيد خليفة


شدوا لك ركب ..فوق مهرك الجماح
ضرغام الرجال... الفارس الجحجاح
السم النقوع...للبدن نتٌاح
تمساح الدميرة ..الما بكتلو سلاح
عصار المفازة ..للعيون كتاح
المال ما بيهمو ...إن كتر وإن راح

أبواتك قبيل بحلوا للعوجات
مطمورتك تكيل للخالة والعمات
في الجود والكرم إيديك دوام بارزات
ويا أب قلباً حديد في الحوبة ما بتنفات

بطناً جابتك والله ما بتندم
ياأسد الكداد الفي خلاكَ رزم
ويا رعد الخريف الفوق سماك دمدم
بابك ما انقفل نارك تجيب اللم
ما بتعزم تقول غير استريح حرٌّم


عينيك يا الصقر في الحاره ما بتنوم
صدرك للصعاب دايماً بعرف العوم
في وسط الفريق في الفارغة ما بتحوم
لا بتتلام ولا بتعرف تجيب اللوم
ود ناساً عُزاز جمعوا المكارم كوم
تفخر بيك بنات البادية والخرطوم

عمر احمد حمزه الكاهلي/الجزيره/ عسير
http://www.halaween.net/forum/images/statusicon/user_offline.gif

Omer Ahmed Hamza
02-25-2011, 09:48 AM
بسم الله الرحمن الرحيم

فرتيقة ام لبوس
غناء / عبدالكريم الكابلى

فرتيقة ام لبوس لويعة الفرسان
الليل بابلي عنزه وقرونه سنان

الكوراك ضرب مرقن جراقده أنداد
أندادة النصارى الكلهم بولاد
كرار علي كبر عليهم زاد
وسيفك في غضاريف الرجال صياد

متين ياعلي تكبر تشيل حملي
إياك علي الخلاك أبوي دخري
للجار والعشير الكان أبوك بدي
للغني والفقير الكان أبوك حامي
يتسولب من العلج الحرير وأكسي
لا تعاين الوجود ضربك بي شر سوي
وسيفك في غضاريف الرجال أروي

جابولنا الكرامه وصبحنا فرحانين
ضربوا دنقرن جوني العيال مارقين
بسأل عن علي الفارس البقود تسعين
هو اللدر العلي ضهرو الخبوب والطين
ما بياكل الضعيف ومابسولب المسكين
الا سيبة الأسد أم قبضة هين

عمر احمد حمزه الكاهلي/ الجزيره/عسير
http://www.halaween.net/forum/images/statusicon/user_offline.gif

Omer Ahmed Hamza
02-25-2011, 09:56 AM
بسم الله الرحمن الرحيم

أسد الخشش
غناء/ مبارك حسن بركات

أسد الخشش الضريه
كابي فوق الوليه
يا ليلا
ود العز والبنيه

شدو ليك البطير
سيفك ياغض الجفير
الكازاك وين يطير
شقيا صادف نكير

شدو ليك البتاتى
كريم الخيل العواتى
وكت الموت ساعتو تاتى
بذكر دهب البراتى
ويشق الزول ان جاهو خاتى

اهلك سموك الأصم
ما سرحوك بى غنم
تامى الهول واللطم
حيرت الفصاح والعجم

انا غنيت جبت نمى
البادراب عتقو دمى
شوف ثمارن كيف يرمى
للعدمان يضبح يسمى

عمر احمد حمزه الكاهلي /الجزيره /عسير

Omer Ahmed Hamza
02-25-2011, 05:56 PM
بسم الله الرحمن الرحيم
عاجبني الكريم


عاجبني الكريم البسند الضعفان
رباي اليتامى ومركز الضيفان


قبال الشهيد بعد المساهر نام
بي عيني بشوف برق الكرم قدام
سايق الخير كتير هاطل سحاب وامام
إسند في الضعاف وبربي في الأيتام
اسمك عيسى يا قشاش دموع الهام
كم حليت كرب وفرجت أمرأً هام



غني وشكري الليلة يالنيّة
فارس حمره عينو زين أبو بنية
للأخوان مدفق خيرو ما شوية
إيدو تملي تدفع ما ها ملوية
عطاي بالألوف ما بدي بالمية
وإن حكم الزمن نار الكرم حية


من ما قام صغير ما بمشي في الفارغات
للجار والعشير هو الدخري في الحوبات
ستار العروض البرفع الواقعات
صاين عرضو راخص مالو للشكرات
دابي الكركرة أسد الخلا أبو عاجات
مقبول يالمشكر للبلية إن جات



غني وشكري يا خضرة الليمون
صنديد الرجال ما بنقدر بالهون
يالحر المأصل يا دهب شيبون
يا ضو القبيله اللي عروض مأمون
سموك اللزوم القاطع المسموم
قضاي الغروض اللي الفقر صابون


تمساح أدبرة الحدر ورود القيف
يا نمر الفروع في الغابة ماكا طريف
يالضل الظليل في هجيرة الصيف
للرايدك محنة وللمعاديك سيف
حق الشكرة صح عيسى البتم الكيف


غنت ليك بنيتاً موجت ديسا
غنت ليك سعاد والدر وبلقيسا
الخيل الكرم عندك وقف ميسا
ياضو القبيلة الحقتوا الريسا
يوم تجي للرجال الحارة بتقيسا
تلقاهم نجوم إلا القمر عيسى

عمر احمد حمزه الكاهلي/الجزيره /عسير

عمر احمد حمزه الكاهلي/الجزيره/عسير

Omer Ahmed Hamza
02-25-2011, 06:12 PM
بسم الله الرحمن الرحيم

الصافي دهب الخزانة
للشاعرة : الحرم عبدالله أبوسن

الصافي دهب الخزانة
الدولة أم فوت سيد بكانة
بريدو .. ودشيوخ البطانة

شدو ليه البمغي الرسانة
ومرق الما بدورلو إعانة
يقيم الليل بالديانة
ويحل مفصول الضمانة

مرق ود كرسي الحكومة
وقشاش دموع الظلومة
الضايقة بفرج همومها
والواجبة بيعرف لزومها

بريدو ود شيوخ البطانة
شدو ليهو قارحو المقلد
نهم تيلادو المولد
نسف الكيس لينا جرد
وشيشك لي الدمعو برَّد

مرق ود بيت الفضالة
تيتب للهاكعة شاله
عظيم بالحيل ياأب قدارة
متل قريش في الشطارة

مرق ود بيت الدراسة
الطاهر خاتي النجاسة
شدو ليهو أم جراسة
ودخل البرطن نحاسها

مرق أب زينا مكمل
لو مسفوه لو مهمل
درعوا البي الجوخ منمر
ولبسو البي الخوخ مسمر

قاضي أوكاته وفروضه
مرق السابلات عروضه

عوق الآلاف بقودو
وحرسه وصنعة جدودو
عبد اللاه يبلغ قصودو
ومتل حاتم يحكو جودو

عبد اللاه دقر الحرايق
ونافي العيب والنقايق
بالأغراب ما هو عايق
كريم أخلاق ديمة فائق
بريدو ودشيوخ البطانة

دارس سايس الطرايق
وفارس جاب الحقايق
وراسي وفي جلوسو رايق
وبحل المسجون وضايق

شدو ليه القارح جوادو
ووافر للعامة زادو
عبد اللاه يبلغ مراده
علي الهايكوت ظعنو قادو

عبد اللاه الفرسان صميمن
يشلع عيقان زحيمن
جدو البيهات عظيمن
ملك ذاوات مو نديمن

شدو قارحو أب فراية
وسل أب جدلة وسقاية
عبدالله كاب الولاية
جليس ستات السراية

فروخوا نفضت بديدو
وتسمع كورو وجضيضو
قود العوق يا عقيدو
النصر والفوز إنت سيدو

شدو ليهو الصر كوروا
ونقرو نحاسو وطبولو
عوق الآلاف يجولو
وثقاة الناس بشهدولوا
بريدو ود شيوخ البطانة

شدو ليه البنسف سبيبو
ومرق الما بعيق قريبو
أمين الجار يا حسيبو
جليس للبارعين وضيعو

غلق زاد مو مخاده
ومرق الخاتي البلاده
النصر والفال هيلو عاده
وبجبد ناس في الشهادة

غلق زائد مسدر
مرق اللي الروح بودر
ركب حافلو المبدر
جدو بضاري وبحدر
بريدو ود شيوخ البطانة

غلق نيل التسابه
وقائد راس الحرابة
قاطع عاقة القرابة
بكان الموت ما بهابه
بريدو ود شيوخ البطانة

يوم القيلة بنعاين
بالطاقات ما هو باين
تقيل موزون بالقباين

سد أم دور بالعساين
ومنع القش بالبطاين

شدو ليه البعجب رسيسن
وقود الخيل يا عريسن
بنات الطيب إت جليسن
والتاج والنيشان وريثن

حفلن ولبسن لبوسن
وجنو سايقات عروسن
دوام مبسوط من خصوصن
أديب ما بواخد جلوسن

حتلن جلبن طقومن
وجنوا طالبات لزومن
دوام مبسوط من همومن
قدر ما يقولن فهومن

شدو ليهو الكورو صر
مو مسفوه مو مخلي
بدر في الحافلة سلة
والمسجون ليه حل

الفروخ بارياهوا بره
وحنوا ولاقو المسرة
بريدو ود شيوخ البطانة

شدو قارحو البلاوي
وشويم لي بيتو ناوي
عظيم ود عمد المقاوي
وقدر ما أقول يهو ساوي

الصافي دهب الخزانة
الدولة أم فوت سيد بكانة
بريدو .. ود شيوخ البطانة

عمر احمد حمزه الكاهلي/الجزيرة /عسير

Omer Ahmed Hamza
02-25-2011, 09:10 PM
بسم الله الرحمن الرحيم

الأصل سوداني


بين زنجي وعرب كان الأصل سوداني
وبين كل الشعوب زان الأدب رباني

عِن حوبة الوطن دائماً تبين همتنا
سودانية سود الكل يهاب شبكتنا
أرزم يا سلاح ساحات غناك اللتنا
وفي الوكرة أم لهيب توزن قبيلة مرتنا

وخليها الرجال المن جفير السيف
مرقت للكتال وشايلاه ضل في الصيف
إتنين نعرفن وبيهن نتم الكيف
كتل المفتري والتاني كرم الضيف

ولينا الحق نقيف وسط الشعوب نتفشر
وفوق الطول نطول والطول يشوفنا ويقصر
مين الزيّنا كل ما إنذكر إتشكر
ومين دلّ القمر غيرنا ومكانو إتحكر

المجد إن وقف بلقانا ساسو وراسو
والعز من قديم بينا إنفتح كراسو
من قمنا الكرم بيناتنا داير كاسو
العدو والصليح من توبنا يلقى مقاسو

وسرنا كان صفينا الزول بنلحسو كلو
وعاقلنا إن عكر مجنون يكاتل ضلو
الكايس العدل عوجو بنمسكو نحلو
والكايس العوج قبال نكتلو نزلو



عمر احمد حمزه الكاهلي/عسير

Omer Ahmed Hamza
02-26-2011, 02:35 PM
بسم الله الرحمن الرحيم
الملحمه الوطنيه الكبري
الشريف زين العابدين الهندي

مســــاهر ليلك الطــــــول نجومــــــو هجـــوع
وغـــرقان قمــــــرو في جوة السحاب مصروع
بصــــــارع فيك ضـــلام تمن سنينو إسبـــــوع
وإراقب فجــــــرك الاذن زمــــــانو سطـــــوع
وشايلك سيف نصُر لا بطيش ولاهُو بـــــــزوع
ورابطك في حشاي من العطش والجــــــــــوع
وأسقيك مني دم ودموع
وأوقدلِك جحيم وشموع

أقش منك دموع الضيم علي خدودك بتتحـــــــدر
وأقـبّل فيك جبـين مرفوع كراية النصــر يوم كبر
وبيرق عزة رفــــــرف في رِكـــــــــاب فاتحــين
وأغســــــل لك تــــــراب الهجــــــرة بالإيديــــــن
وإجيـــك المجــــــد مدخـــــــــور لك سنين ودنين
ومن حبـــــــــوبتك الوقفت تــــــــــــرد الــــــدين
وتطـرد حملة الباشا ومع الغازين
حليله مهيرة كاسرة التوب وحدّ الزين

ومن جدك بكبِّر فوق جبل سرخام
ودافن ضهـرو فـي كرري ومتكنتل رِكاب ولجام
وسال في إيـدو سيف العود ببعج بيهو كبدة وهام
وقبّال دمو ما يرشح مع البارود يكون شتت عليك أجسام

أجسام من غزاة ما قًدروا يسبوكِ
ولا كشفولك المُقنع ولا في الشينة ختوكِ
ولا خلـولك أحداقم ولا هم قدروا يدنـوكِ
ومما فاتو لي حسي بدورو رضاكِ ويطروك

وكـيف ينساك وذكراك لي دماهو عروق
ومما الهجرة حلت ليهو لابسك إنتِ عمة وطوق
وعايشك جوّة وجدانو معايشةَ الحنين لي الشوق
وممـزوج فيك ممازجة اللسان للذوق

بشوفك في عيون النيل وفي الأطفال
وفي تاريخك الأخضر علي الأجيال
وفي بحر الدُمي اللسه بجم سيال
وفي مستقبلاً واعـد كبار وعـيال
بشوفك بشـري فيك شققْ جبال ورمال
وفي حدقاتو مـفتوحات تـلاتة ليال
بترسم لي طريق نجـم العشاء الولوال
وتكشـف فيكِ أسراراً كتار وأهـوال
ويلقـاك حتي في رمش الغـريب الضال
مهمـوم في اليمن لي الحامدي لي السلال
ويلاقـيك في الخـليج مشـرورة حـالك حال
ويثكل فيـك بيبعوك بي الدهـب والمال

فلذاتك مبعثرة في البـلاد مأجـــورة
تــبني علي الرمال أحلاما ثم قصـورا
خلوك سايبه في إيد الطغاة مأسورة
شان ما يسلموك الحلبي روب في كـورة

أبشري نحـن لسع في الخلا مرابطين
ونحن عقاب عهود أنصـار مع مهاجرين
ونحن سهاري ما بنعـرف غمضة العين
ونحن فداك نــزود عنك بقالنا سـنين
وحالفـين بيك قسـم غـالي وعزيز ويمين
ما نضـوق راحة لا نشوف زوجة لا والدين
ولا ندفـن رؤوسـنا علي الرمــال خايفين
حتي نوقي من أشلانا أعلامك علي القصـرين
وحتي نسـوي لي القصـفوك مقـبرتين
وحتي نكسر السـد وينقـسم نصـين
ويكون عيدنا الكبير في مقـرن النيلـين

وما بنساك عشان يطراك في الأزمان
قريب منك قرابة الحدقة لي الإنسان
وجايل فيك جولة الدم علي الـوردان
وقيمتك عندو زي قيمــتك معاهو زمان
بعيـشك هضبه بتشارف تلال قيسان
ويحياك موية في دارفور تبل عطشان
ويديم فيك من سنار ترع خزان
ويدفق خيرو بي عند الرهد بسـتان
ويقول لي الدندر الغاضـب كفاك جيشان
ويسهر لي وليداتك يعشي الحاري والجيعان

منو الزيك ولد وإستالد الأولاد
منو الزيك بجيبم ديمة عشرة أنداد
منو الزيك ببز الدنيا موية وزاد
منو الزيك ضروع وزروع ونيل مداد
منو الزيك بطانة وغـابة دون حداد
منو الزيك سهول وادي وجبال أوتاد
منو الزيك أصل موروث من الأجداد
منو الزيك جراتق دم قُــدام وجداد
قشي الدمعـة يا بت الرجال ما بحكموك أولاد

بت الحر وأم الحر وأخت الحر
وست الضنبو مردوم بي وراهو يجر
ست الفي الخشش من العصير بنتـر
ست الخيل وست الفي القلوب بنقـر
وأم الحلفو بيك وبي العذاب المر
ما بختولك الشينة ومناحة كـر

أولادك فضـــلة الموت وبتلجـوبو
ودايماً سيرتو في لسانم وبتسلوبو
وزرعك من زمن المهدي طارح دوبو
واحدين بيحصدوا وواحدين بفكو دروبو

تيلادك مسكر في الخِزن محروس
هجليج وإنـدراب ومهوقني وأبنوس
ومن صمغ الهِشـاب سوي السنط ترتوس
ومن شدر التبلدي الموية كوس في كوس
ومن ضل النخيل الشمس دايرة تكوس
ومن حرب المطر طبع الحراز مـدروس
ومن شــوك السدر جيش السلم هكسوس
ومن زهــر التبـر البـاديه باقيه عروس
وبي تـوب الَبـرم سوي الطـلح ملبوس
ومن شـدر الأراك عطـر الدِعـاش مبثـوث
ومن سيف العشر جيش هكس صـار مهـروس
والـدوم واج بقيف العطبراوي خـروس
وفـيك الفيــل وفيك العنزه والجـاموس
وفـيك التـيتل الليات قـرونو تـروس
وفـيك الأصـلة والدابي أب درق وجروس
وفيك أسد العرين رب العراك والدوس
وفيك ريل الودى البي نالو راتع يجوس
وفيك فهود وفيك نمـور وفــيك طاووس
وفيك صقـر الكواهــله العينو كالفانوس
وفي نيـلك عُـشاري بشـيل مـن الجاقوس

فيك الازرق البي عرقــــــــو هد القيف
وفيك الابيض الماش منطرح ما بقيف
وفيك رهد المفازه الوعــــدو ما خليف
وفيك الاتبراوي اللي الشواطي مخيف

في غروبك ربوع خصبة وتبر مبــهول
وديان من عقيق مغسولة مطر وسيول
وكثبان تابة بتطرز حـــــــواشي سهول
تجودي الكركدي وصمـغ الهشاب والفول
وتدي القنقليس طول الشهور والحول
وفيك حـفرة نحاس وابوتولو غير مصقول
والعيش والســــماسم والصمغ والكول
والتور والخروف والـــــناقة والكاتول
علي دينار كسب ليها الشـرف والطول
ابـــــــــوزكريا اداب العصاة زول زول
من وادي بيكربت في ربوعها ويحول
لي الكفرة وصحاريها العجاف الــهول

وجبل مرة الشمخ جايب منــاخ لبنان
فجر مـــــــــن ينابيعو العجاب بستان
طارح عنبو والـــــــزيتون مع الرمان
جاب من يافا تفاحا كبــــــــــار ومكان

حبابك عشــــــرة يابت مقرن النيلين
حبابك يـا ام عجن بعد العديل والزين
حبابك يــا المحكرة في الفؤاد والعين
حبابك يالمغسلة بـــي طهور مويتين
حباب اهلك بيلاعبوا المـــوج مع البردين
حبابهم كتفوا ابوطـــــــــليح علي اللقنين
حباب قصرك ضبح غردون من الاضنين
حباب الخندق العجــــن الجلود بي الطين
زغرتي يا ام رشوم قولي البطان وين وين
بركــــــــــــــــز لما سيطانهم تبيد وتلين
ولما يشوفوا قطــــــــــــع ايديا بالسكين
ولما تقول حمامـــــــــة كفاك دقر يا عين

سلام يا القلعة بي بدورا وجــواهر تاجا
سلام يا اب عنجه خورك لاقـا نيلو ناجا
سلام يا اب روف وودنوباوي ضــو سراجا
سلام ديم اب سعد نــــــار الخيم وجاجا
سلام اللــــــــــــه اكبر في الفتح دجاجا
بي سيوفا ورمـــــاحا ولي الحمد ثجاجا
بحـــــر ابيض فتح ابوابو وقت الحاجة
زي ما مـــــــوسي عدي لا تعب لا حاجة

كلك ادبــــــا من عشاق وفنانين
شالوك فـــــي عيونهم وصوروك تلوين
وشاشوبك شعر مطبوع جزيل ورصين
فيهو ام در وفيــــــــهو الاسكله وستين
وعازه الفي هواك نـــحن الجبال شايلين
ويا فلق الصباح قـــــول لي نهارك وين
وترعاك في الفؤاد بي عناية الحارسين
ويا كروان كـــــرومه خليل فرح ما بلين
ويــــــــا ود الرضي القلبو انقطع نصين
تري العبادي مــــاسك الدابي بي الايدين
ود الريـــــــــــــــح الشارك عتيق جيلين
وداك الامـــــــي والمساح عريس ام زين
وفيك الحاج سرور غني الفراق لي متين
ومو عارف المفارق قدمو ماش لي وين
ويا عازه الفراق طــــــال بي وكلو حنين

عمر احمد حمزه الكاهلي/الجزيره /عسير
http://www.sudaneseoutline.com/out/mwaextraedit2/frames/br9.gifhttp://www.sudaneseoutline.com/out/mwaextraedit2/frames/bl9.gif

Omer Ahmed Hamza
02-26-2011, 04:09 PM
بسم الله الرحمن الرحيم
خال فاطنه


شاعرة الجوابرة كلتوم محمد عبدالرازق والطفلة فاطمة بنت عمر ود احمد وهى ابنة أخت الفارس نقدالله ود عمر وكانت وقتها طفلة في طور الرضاعه ولقد أعجبت الشاعرة كلتوم محمد عبدالرازق بشجاعة نقدالله ود عمر فقالت قصيدتها المشهورة ( خال فاطنة) والتي تقول فيها ...

سام الروح سبله .... أنا أخوى جبل الضرا
سيد أم رطين ما ضل ... فارس الألف نقدالله
يسلم لي خال فاطنة ..... بلالى البدرج العاطله
أب كريق في اللجج ... سدر حبس الفجج
عاشميق حبل الوجج ..... أنا ابوى مقلام الحجج
يا خريف الرتوع ....... أب شقه قمر السبوع
فوح بيتو بسند الجوع ..... يا قشاش الدموع

عمر اجمد حمزه الكاهلي/عسير

احمد بن فؤاد القرشي
02-27-2011, 03:29 AM
الراقي والمميز دوما
عمر احمد حمزه ابن القبيلة البار

والله قمة الشموخ هذا الادب الرفيع الذي تقوم بجمعه هنا
فشكرا لك لجعلك المنتدى قبلة لك من ارد الادب والحماسه


دمت في حفظ الله

Omer Ahmed Hamza
02-27-2011, 10:00 PM
بسم الله الرحمن الرحيم
الاخوه الاعزاء في الاداره سلاااااااام
نرجو شاكرين ومقدرين لكم ان تثبتو هذا البوست الشعر الحماسي حتي نطلع علي موروثاتنا في مسارح البطوله والملاحم والفداء لاننا سوف نضيف الكثير لمنتدانا حتي يصبح اكبر منتدي يوثق الشعر الحماسي ان شاء الله ودمتم في خدمه المنتدي
عمر احمد حمزه الكاهلي/عسير

Omer Ahmed Hamza
02-28-2011, 10:34 AM
بسم الله الرحمن الرحيم

حماس وكرم

الشاعر احمد محمد الشيخ الجاغريو

نحن صغيرنا عنده حياته ما هميه
وفى زمن الحروب الواحد يزن الميه
نحن أرواحنا يفدن ناس سعاد وصفيه
ونحن اللي وطنا وعودنا ديمه وفيه

نحن فرحنا يوم الكتله والمكيه
يوم حر النهار ويبقى الكتال باكريه
الموت هيلنا قُبال تظهر التركيه
والعادانا كُله خلفنا ليه الكيه

لو بقت الشجاعه من النفوس ممحيه
ما بتفوتنا حارسه قلوبنا دائما حيه
نهاجم الموت نخش وكره ونجيه ضحيه
نهز في الحي والميت نعده ضحيه

صوت المستغيث نقمز نجيه سويه
وننحر خرزه الشايل لضيفنا هديه
نطرب لي قنابل الطائره الجويه
ما فينا البمد إيده وتصد ملويه

يوم الحاره يوم تبقى الحروب دوليه
والفارس أب زنود قدامنا يبقى وليه
ما بنخت نقيصه إن متنا بالكليه
بنخاف من ملام ست السُوار أب ليه

عمر احمد حمزه الكاهلي/الجزيره /عسير

Omer Ahmed Hamza
02-28-2011, 10:42 AM
بسم الله الرحمن الرحيم
المدفع الرزام
الشاعر عمر البنا


المدفع الرزام طلقاتو من صدرك
يا جبل الضرا المافى سيل حدرك
النار ولعا واتوطا فوق جمرك

ألف بجيب شكرك
يا حاتم زمانك يا السديد فكرك
يا التلب اللزوم الشلت فوق دبرك
يا أب دربا زلق كضب البشق وكرك

لزام التقيله والعاطله دراجه
وروني العدو واقعدوا فراجه
كان ما اشت شملهم واديهم الحاجه
ما برجع تانى للزندو عاجه

الأسد المربعن حارس جبال برى
نتراتو الفى بارا مسموعه في برى
ما بعرف كلام الهشكى والهبرى
وقت الصح يبين يا أم خد بجيك خبري

من عصرا كبير حس النحاس قحّ
الفارس برز والخايف اتنح
وقت الشوف بشوف اخوكى يا السمحه
فرتاك الصفوف أقلّ من لمحه

يا فارس اللقا وعصار ضهور الخيل
يا الحقيت كلام أم سر وست الجيل
في يوم القتال سموك فشق الفيل
لميت في الفرسان بهدلتهم بهديل

غربلت الفراسه وأخدت صافيها
وان جاتنى الألوف غير شك بكفيها
تعرفني أم خدود وأنا بعرف الفيها
النار ولعت بى كفى بطفيها

عمر احمد حمزه الكاهلي/الجزيره/عسير
http://www.halaween.net/forum/images/statusicon/user_offline.gif

Omer Ahmed Hamza
02-28-2011, 10:47 AM
بسم الله الرحمن الرحيم

أخوان آمنه
كلمات / عمر البنا

نحاسهن اترزم
خيول المحاص الكرفن لي ريحة الدم
هن بتصاهلن وعقيدن اتقدم

قوم شوف الخيول يا خوى عدادهن كم
قودهن للحرابه وفيهن اتحكم
كم فارسا عنود من شوفتك أتبكم
اقطع دابرهم بى سيفك الأبكم

شدولو وركب فوق قارحه الأدهم
لحاق الصديق والجار في ساعة الهم إن حمر في الزول غير شك يكتلو وهم
يتدردق تقول مضروب بألف سهم

أسد الكرمت الفى عرينه يتنتر
اقدل يا جنا فوق عزك اتبختر
اهجم وأتذكر عيون عبله يا عنتر
ادخل العوق وخلى الصف ورا ينتر

وقت النحاس قح وقلب حربي
دا اليوم الفيه أم حداقه نفخر بى
تبراني الصقور وتتغدى من دربي
أكلى من القلوب ودم الرجال شربي

جينا منصورين أبشرى يا آمنه
جُرى النم علينا وارقدي متطامنه
مسكناك لسانا واسمعي كلامنا
إن حوتا الألوف ما بقيفوا قدامنا

عارفاكم تمام انتو فرساني
وما فيكم جبان في الحاره بنسانى
ترفعو راسي عالي وتطولو لساني
الرجاله حارساكم والسماحه حارسانى

عمر احمد حمزه الكاهلي/الجزيره /عسير
http://www.halaween.net/forum/images/statusicon/user_offline.gif

Omer Ahmed Hamza
03-30-2011, 11:05 AM
بسم الله الرحمن الرحيم

الباسل بابكر


أخويا الما بنقــدر سيل الوادي المنـــــــــــــحدر
الليله أخويا جـــــــــاكم حــــــــــــــــــــايم
صاحــــــــي ما بتلقـــــــــــوه نـــــــــــــــــــائم
شادي الخيــــــــــــــل امات لجــــــــــــــــــــايم
اســــــــــــــد الخشـــــــش اب قـــــــــــــــوائم
هاشـــــــك فـــــــــــوق ام تمــــــــــــــــــــــايم

النيـــل العـــــــــــم التراســـــــــــــــــــــــــــــه
البليـــــــــغ من غيــــــــــــر دراســــــــــــــــه
خاتنلنــوا النظــــــــاره وراســـــــــــــــــــــــه
شـــــــــــدوا علــــــــــي أب جراســـــــــــــــه
وقفــل ابـــــــــواب الفراســـــــــــــــــــــــــــه

صــــــد ياعـــــــــــازل وانقــــــــــــــــــــــرع
ده الاصل والنــــــــــــــاس فــــــــــــــــــــرع
الوافـــــــــــر ما بنضـــــــــــــــــــــــــــــــرع
سيفــــــــه وكتيـــــــــــن ينشـــــــــــــــــــرع
بياخد الـــــــــزول والـــــــــــــــــــــــــــــدرع

ماشفت اخـــــــــوك ياام سماحـــــــــــــــــــه
العاصيـــات كســــــــــر جماحــــــــــــــــــــه
عينــــــــــــه للبعــــــــــيد لماحــــــــــــــــــه
الخـــــــــيل الشبكــــــــــــــن رماحـــــــــــــه
شافنه وصـــــــــدن قماحـــــــــــــــــــــــــــه

ماتهمــــــــوك بنميمــــــــــــــــــــــــــــــــه
بتكفــــــي ضـــــــــــــيفان الهجيمـــــــــــــه
سيد بت فــرج وسيـــــــــد حليمـــــــــــــــه
القصدوا التار رضـــــوا بالهزيمــــــــــــــه

عمر احمد حمزه الكاهلي/عسير

Omer Ahmed Hamza
04-05-2011, 02:14 PM
بسم الله الرحمن الرحيم

بدخل في المحاص

كلمات زينب بت فايد قالتها في أخيها الحسن ود فايد... تغنى بها أولاد المأمون وبادي محمد الطيب

بدخل في المحاص أب جلة بتفور قاهر
صمد البجن طابور

شدولو فوق تاتاى
مطلوق الجبين اللى عرضو مو نساى
عجل مشن اب قرون للساهله مو رعاى
لسع صغير وقتين يسوى كيفن الرأي

أرباب الفراسه الوسمو فوق ناظرو
والعوقه أب صفوف انت بتجى بتناظرو
ود فايد حسن ما بتقدرو تناظرو
والخوف حين قسمو أخوى ما حاضرو

يا شقاق عتامير الخلا والصو
يا أب قلبا شجيع صوانو واقف كو
أشعت في القتال ليهو العرض والهو
في كباد الرجال شبع صقور الجو

الليله العيال اتسامرو البارود
جاك يا من كان على صف الحرابه يقود
ود فايد حسن الفارس المأسود
كوفيتو أم عبل وسط المحاص بتخوض

عاجبنى العيال الكلهم نجاح
جاك يا من كان يجيك فوق العبار مو شاح
ود فايد حسن الفارس اللفاح
أتبسم لقاهن بين الحجل والراح

عمر احمد حمزه الكاهلي/عسير

Omer Ahmed Hamza
04-05-2011, 02:28 PM
بسم الله الرحمن الرحيم

كاسر ياجرو الخلا أبو ساجور .

كلمات حوه بت تندل

لساني فوقو بقول كاسر يا جرو الخلا أبو ساجور

غنى وشكري يالصفره مستوره
فوق تلب الخلا الغابتو محجوره
يامرض القلب وما بتخاف روبه
نوسار للخصيم لمن يموت طوله

غنى وشكرنو يالتلات أخوات
لا رجفت لحمتو ولا لسانو اللات
السيف في يمينو بقدل على الدرقات
الخزين أخوى ومقنع الكاشفات

غنى وشكري يا خضرة الليمون
من قومة الجهل عرضى واخوى مصيون
يالقدح السبيل انت الجراب مجرور
يا ب سيفا بسل الخوده والصنقور

الشدرة الضليله الما نقرها السوس
فوق رأسها النمر وفوق ضلها الجاموس
شن تمشى وتقول لامات قرين مرشوش

ما دايراكم أنا تكيلو تدوني
وما دايراكم أنا تخدمو تعشوني
دايراكم الليله القوم فى البلد قالو بيسوقونى

ما دايراكم أنا تدوني عيش في جراب
ما دايراكم أنا تكسوني لي قرقاب
دايراكم أنا وقت الشوف يشوف تهزو بى أم قلاب

عمر احمد حمزه الكاهلي /عسير

Omer Ahmed Hamza
04-05-2011, 11:50 PM
بسم الله الرحمن الرحيم


الدود قرقر


قالوا الــدود قرقر حبس الدرب
الليلة الدود قرقـر حبس الدرب
الدود يا عيـال مطر الخلا الهرّاج
الدود يـا عيال كم درّج المحتاج
الدود يا عيال فتح الدرب مدهاج
الدود يا عيال صقر الخلا البرّاج
تلقاه في أوّلن تاني للعقاب درّاج

الدود يا عيال فوق سدره ليهو نهود
الدود يا عيـال فوق إيدو ليهو ذنود
الدود يا عيال بنتر بقول أنــا دود
الدود يا عيال توب عرضه مو مقدود
الدود يا عيال أسد الخلا أبو خـدود
حالف باليمين لا يجيب وجوهن سود

أمـانة قي أب حشيش وأب قـيق
سيفه القي الجفير مهره البسك في القيد
وراكم كتال ضحوة هلالي أب زيد
كل اليمسكه يكـاكي ويرمي الـبيض

يــا وليدات الكجر
كعب التغــا والحقر
سخيل ما بناطح بقر
والسحليه ما بتبلع دقر

الليله أب كريق عرّش مع البيّـاح
ود بيت اللقـا والدنـقر الـنّقـاح
في قلب المحاص والكافت اللفّـاح
أركزو يا عيال خلق العيال فضّـاح
ما شفنا أم دريقه بتكتل التمســاح
عمر احمد حمزه الكاهلي/عسير

Omer Ahmed Hamza
04-05-2011, 11:55 PM
بسم الله الرحمن الرحيم

للميدان مارقين سوا


للميدان مارقين سوا .... هوى الليله
شافن العدو انكوى

يوم الدفاس والدودوا ........ المسقى في الهامات عوى
ما ضلوا ما بعرفو الحوى .... وعدوهم يشرب ما روى

سيوفُن للطغيان دوا ...... وخصيمن ما بشم الهوا
يوم الجبان خاف وانطوى .... أخوى زى صقر الجو خوا

يوم الخيول العركلن ..... فوق الجثث اتكلن
ديل زغرتن ديل ثكلن .... وصقور الجو جن ياكلن

أماتو قالن لو اللدر .... مالنا بنشوف جسمك خدر
قال ليهن الدم بنحدر .... وان مت ما تقولن ودر

قالن له اصبر يا المهل ..... حارس البيوت حارس الأهل
قال ليهن المكلوف صهل ..... داير الدفاس وسط السهل

عمر احمد حمزه الكاهلي/عسير

Omer Ahmed Hamza
04-07-2011, 12:02 PM
بسم الله الرحمن الرحيم


الكنداكة

الكان داكا سيدي سيدي الاراكا
أبوي وينو الايدو عطايا
أبوي وينو مرواد العمايا
أبوي وينو الشايل العصايا
أبوي وينو بحر الظمايا

اها لينا سيدي بعبي الكيلا
أبوي وينو سيد الطاحونة
أبوي وينو البعصر جنايا
أبوي وينو كاسي العرايا

أبوي وينو سيد القدح البجر
سيد الساقية البتخر
سيد الحلقة البكر
نارو بتوقد فجر
ولدوهو ليلة القدر
سموهو حسب الرسول
سيدي الوارث الشيخ ود بدر

بمدح و بقول ابيات
لود ا لخلوات
وكت العيش بقى بالملوات
يا اب آمنة حوبتك جات

متل أبوي وينو نحاسو البنزل
الجدري الحبس المازنقل
أنا بملا فوقه النشيد
الواقف فوق الحدود
يوم تجلى و يوم تزيد
معلوم فتح الرشيد
سيدي الوارث الشيخ ود بدر

عمر احمد حمزه الكاهلي/عسير

Omer Ahmed Hamza
04-07-2011, 12:52 PM
بسم الله الرحمن الرحيم

الجنزير في النجوم

كتبت هذه القصيدة الحاجه :زينب بت عبد المجيد
ومناسبتها كان النجومي شقيق الشاعره زينب يشكل خطرا علي المستعمرالانجليزي لانه لاينصاع الي اوامرهم وطلب المفتش من الجنود اعتقال النجومي ودخلو ا ام مغد في وقت الظهيره ووجدوا النجومي جالس داخل المنزل وتم وضع الكلبيش علي يديه التي كانت ان ذاك تصنع من الجنزير العادي ولم رات زينب هذا المنظر كتبت الجنزير في النجوم زي الهيكل المنضوم مابخاف الفي المحاصه زموم واستخدمت الشاعره في هذه القصيده بلاغه اعجب لها كل المهتمين بالتراث

الجنزير .. في النجوم
زي الهيكل المنظوم
ما بخاف في المحاصة زموم

غنيلو يا أم رشوم
دابى الروم شرابو سموم
ما بخاف في المحاصة زموم

إنت .... يافرنيب
جازم مابتجيب لي عيب
اسمك في الرجال عمسيب
وإنت لي الضرس عرديب

العيشتو مي عوايل
وجدك بضبح الشايل
اضرب كفك الطايل
ماترى الجنزير سمح وخايل
مابخاف في المحاصة زموم

غنيت بجر قولو
كضبو القالو بتنولو
هو التلب العرك زولو
ماترى الخصيم قصر طولو
مابخاف في المحاصة زموم

عمر احمد حمزه الكاهلي/عسير

Omer Ahmed Hamza
04-07-2011, 01:17 PM
بسم الله الرحمن الرحيم

البخيت وموسي والطيب وعبد الدافع 2

ما حرسو الجري صدرك موشح بالدمي
ما بخاف فارس الحديد إن حمي
فارسنا البخيت التم شكراتن
صديت الخيول وقمحت ركباتن
يافارس الإلوف
الانت كفيتن
وكبست الدروع
وشلعت خوزاتن

من قومت الجهل
ليهو الخوف ولا قسمو
مدخور في المحافل
في الدون كتر عشمو
تقدل فوق بكانن
النحاس خلف شتمو
وركز البخيت
الفال والنصر ختمو

من قومت الجهل
الخوف ولو كارو
والهوي والشرق
اتصنتو افعالو
العوقا ام صفوف
قالو البخيت شالو
مضروب في الوجن
ولا جاني بشمالو

ماحضرو معاك اخوانك الديدان
قمزو الخط علي خيل بجن ريقان
وكت الشوف يشوف صدرك يزن دلهان
سوالن جهاد حمزة وعلي وعثمان
ما بيخاف
فارس الحديد
إن حمي

عمر احمد حمزه الكاهلي /عسير

Omer Ahmed Hamza
04-08-2011, 12:27 AM
بسم الله الرحمن الرحيم


قصيدة أنا المسلم

أنا المسلم دستوري ومنهاجي كتاب الله

وقائد دربي الهادي محمدنا رسول الله

وداري موطن الاسلام ما دوى نداء الله

وأهلي امة الاسلام هم حزبي وحزب الله

وزادي بعد توحيدي ونعم الزاد تقوى الله

انا المسلم قلبي خافقا دوما بحب الله

وأقوالي وأعمالي أعطرها بذكر الله

فبسم الله أبدؤها وأختمها بحمد الله

وهمي في الحياة هداية الدنيا لدين الله

فعيشي ان اعش لله وموتي في سبيل الله

أنا المسلم دستوري ومنهاجي كتاب الله

وقائد دربي الهادي محمدنا رسول الله

وداري موطن الاسلام ما دوى نداء الله

وأهلي امة الاسلام هم حزبي وحزب الله

وزادي بعد توحيدي ونعم الزاد تقوى الله

أنا المسلم لا أرجو ولا أخشى سوى ربي

عزيز النفس لا أحنى لغير الله من صلبي

سليم القلب لا أحمل للناس سوى الحب

غزير الدمع في المحراب ليث الغاب في الحرب

أنا درع لأوطاني انا حامي حمى الشعب

أنا المسلم دستوري ومنهاجي كتاب الله

وقائد دربي الهادي محمدنا رسول الله

وداري موطن الاسلام ما دوى نداء الله

وأهلي امة الاسلام هم حزبي وحزب الله

وزادي بعد توحيدي ونعم الزاد تقوى الله

أنا بالعدل والاحسان مؤمور وأمار

أنا نبع لكل الناس بالخيرات فوار

رحيم القلب لكني على الطاغين جبار

أنا كالماء رقراق أنا كالسيف بتار

أنا نجم أنا رجم أنا نور أنا نار

أنا المسلم دستوري ومنهاجي كتاب الله

وقائد دربي الهادي محمدنا رسول الله

وداري موطن الاسلام ما دوى نداء الله

وأهلي امة الاسلام هم حزبي وحزب الله

وزادي بعد توحيدي ونعم الزاد تقوى الله

عمر احمد حمزه الكاهلي/عسير

Omer Ahmed Hamza
04-10-2011, 02:22 AM
بسم الله الرحمن الرحيم


أب جدير

أب عاجات اللحو وكتين يزم وينتر إن جات الإلوف لا بضل ولا بفتر
حوّد يا الخصم بغادي دربّو بضر أب رسوة أب هرش الضارب الوكرّ
اتُمساح دار كلي البمرق مع الهجعّه أبوشمّا اللزوم كم درج العاطلا
هو الأسد المربعّن دونو الرُجال قاصره ياحليل أب جدير الفارس المنبور
يحرن في المحاص وكت الحرابة تدور في اليوم المشوّم تبقى الحِجازا صقور
بيهو بيجبر الصف إن بقت مكسور بجيب قولّن في أبويا ماهو شُكر
مثبوتات فضايلّو ومافي من ينكر أب زيد الهلالي زايد عليهو قدر
عباس تور قريش منو مابقصّر زِناد إن حركوهو بقوم ولا بفكر
دايماً فاك ضراعو وبيهو مابفشر رحل ياشمّا أبوك وقفّا خلا الدور
وإنحللا النِظام الكان زمان معموربي رحيل ناس أبوك قبل العبوس ماتدور
إنهدّا الجبل وإشتت المعموريا أبو زينب وراك إتكشّف المستور
دابي القاش حِليلو الفي المحاصّا بِكُر من شوفتو بتضل ناساً دِقونن قُر
إن شاف الحديث زائد بقالّو كُتر بشلح في الصفوف أمات طبول وزمر
زي حمزة الجسور في يوم أُحد وبدر سم الصاقعة أبوي اللي الخصم بدمر
أب قدحاً سبيل مسا وصباح مجرور ولي الضيفان بباشر ووشّو ما مصرور
منو البمسك مكانك ويفهم المقرور بتتراجع في المواشي وفي خِدمة البور
غرارة العبوس ما بتنتبه لي زول حُكم السيد نفد ما بنحجب مقدور
تُمساح القيوف اللي العدو بتكيل ياأب مسكاً يفوح يعم القريب وبعيد
يوم جاني الخبر أسفاً عليا شديد ياعمدة كلي فرقك علينا صعيب
ياالعمدة أب جديري فرقك علينا صعيب

عمر احمد حمزه الكاهلي/الجزيرة/عسير

Omer Ahmed Hamza
04-10-2011, 02:29 AM
بسم الله الرحمن الرحيم


جبار الكسور


دا الفي الضلام كبّاس دا البفزّع قبل يبكو ويضيقو الناس
جبار الكسور ميزان الدهب يا أب كفةً راجحة
أبواب مسكنك ليل والنهار فاتحة
يا أسد الضلام يا أب ولدةً ناجحة
صقر الخلا عينيك سلاح جارحة
البموت بين إيديك مابقروا لي الفاتحة

الدود النتر صحّا المرافعين هوب
دا محشّم قبيلتو البستر المكشوف
إن شافك عدوك يرجف يغلبو الشوف
النار في الجسم والطعنة جوا الجوف
عشاي الجماعة يا مشبع الملهوف

ميزان الدهب ياالغالي وزنو تقيل
ياأب صدراً ركيزة تب مابغلبك شيل
يالدابي البِسم العاتي زي السيل
ستار العيوب حاشاهّو ما قويّل
وكت الناس تضيق بلفاهّا هجعة ليل

عمر احمد حمزه الكاهلي/الجزيره/عسير

Omer Ahmed Hamza
04-10-2011, 02:41 AM
بسم الله الرحمن الرحيم


بطانة ابو علي وحسان

دي بطانة أبعلي العند الشعور مفهومة

شرطاً للبدورها محنضلة ومسمومة

كم لله فيها مفقشين هام رومة

بالدم والرمم لا عند جزم موسومة


حسان وابعلي واب سن حدار الجار

كاتلين عز مكوك كم بردوها الدار

من الهايكوته لي البلد ابو قنا وصغار

ما خلوها نية تتقلب للنار


نحن نسوي لكن ما بنقول سوينا

نحن نفرتق الكرنة ام صفوف بايدينا

الزول البضيف عدم الشراعة علينا

يفهم مني ويسأل من توارخ النينة


نحن الود لبونا بشيل حمول النائب

تصرم عندنا القحية البصيبها الصائب

نحن اولاد شكير جور نالنا كلو نقائب

ديمة نلولي في المحن الكبار وغرايب


بندق فيك نحاساً من قديم راجينا

فيه خيولنا عارضات كيه للمابينا

كان ما تجرتقك دماً علوجه سمينة

لا تجيبي لنا حنتوت يا ام هواياً زينة



حليل اهلك حليل البردوك قبيل

دا هجين المقادير بي مرور الخيل

قبال التصاويت والبهادل ديل

ما شافو الاضافر في جوامع السيل


عمر احمد حمزه الكاهلي/الجزيرة/عسير

احمد بن فؤاد القرشي
04-15-2011, 11:06 PM
والله يابن عمي قمة في الإبداع والتميز كالعاده

توثيق مميز جدا واختيار موفق
اعانك الله على هذا التوثيق المهم جدا

دمت في حفظ الله

Omer Ahmed Hamza
04-18-2011, 10:07 PM
بسم الله الرحمن الرحيم
الاخ احمد فؤاد الزعيم تسلم
ونتمني تثبيت البوست
عمر احمد حمزه الكاهلي/الجزيرة /عسير

Omer Ahmed Hamza
04-18-2011, 10:11 PM
بسم الله الرحمن الرحيم

محمد طه القدال
حليوة ليلة المولد
*************

بقول غنوات وأقول غنوات
فى البلد ا لبسير جنياتها لى قدام
ولى الولد البتل ضرعاتو فى العرضة
ويطير فى الدارة صقرية
ولو السمحة تلت إيد ومدت جيد
يقوم شايلاهو هاشمية
ويشيل شبال ختفة ريد وفرحة عيد
وريدة روح وحمرة عين وايدية
* * *
ويالولد البشيل مدقاقو
قولة خير على القمره
يقابل الجاية متحزم
ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
* * *
وقبال حول تغّيم غيمة قِبلية
ترش الدارة والحدبه الصعيد الحلة
ويا فرحة بتطارد الصفقة فى النسمة الصعيدية
ويا جهرة نهار الليلة بدرية
رحيح جنياتنا فى الحدبة الصعيد الحلة
* * *
يا سمحاتنا هو لبلب
ويا قمحاتنا هو لبلب
وياللوز الفتق فى الوادى هو لبلب
ويا سمحاتنا هو لبلب
ويالبحر الطمح مدّادى هو لبلب
سألتك بالذى ركز الارض معبد
وسوى الفاس عليها مقام
سألتك بى حشا الأُمات ودمعاتنا
* * *
سألتك بى كبيداتن ودعواتنا
شليل وين راح؟؟
يكون ضل الخريف فاتنا
شليل وين راح؟؟
وزى برق السماك الجابها دغشية
وزى زغرودة البطن الكبارية
مرق من شامة القمره
ومقدم بالعديل يبرا
تعالوا أبشروا آجنيات
شليل ماراح شليل ما فات
شليل عند المسورو حرق
بقالو حصاد
شليل فوق التقانت قام خدار وبلاد
شليل مسدار شليل مشوار
شليل أرضنا يا جنيات
شليل قايم نصاصى الليل
يتمتم ليلو وردية
حرازنا شليل شليلنا دليب
شليلنا دليل على البلدات
بعد درب التبلدية
شليل ما راح شليل ما فات
شليلنا ونحنا همباتة ومهاجرية
مزارع بات على عشقين
تراب بلدو وسماح فوق بت مزارعية

عمر احمد حمزه الكاهلي/الجزيرة/عسير

Omer Ahmed Hamza
04-26-2011, 10:15 AM
بسم الله الرحمن الرحيم

الحسن صاقعة النجم


الحسن صاقعة النجم
البحمى الشهادة والنضم
هو الليلة من السوط ما بهم

خرت صاقعة الصباح
دى الجلة البارودة فاح
علمت ليك الصلاح
الاصم يا تارك المزاح
هو الليله من الموت ما بهم

خرت صاقعة النهار
دى الجلة الباروده نار
علمت ليك القهار
يا تارك الهظار
هو الليله من الموت ما بهم

حسن يا حسن السرور
يا ود ليلة القدر
إن شاء الله عمرك يطول
مثل مجارى البحور
هو الليله من السود ما بهم

أنا غنيت أجدت النم
فوق عجل الدك الأصم
من الرصاص ما اتلخم
أبوك بموت تحت الزخم
هو الليله من الموت ما بهم

عمر احمد حمزه الكاهلي/الجزيرة/عسير

Omer Ahmed Hamza
06-12-2011, 12:25 PM
بسم الله الرحمن الرحيم

دابي السار الرسي

دابي السار الرسي
فوق اب دربا قسي

تغني ليك الفي العبك
يا خيري بشكرك
ويوم باروده العبك
عمر حلال للشبك

تغني ليك ام زمام
طريد الصاقعة ام زحام
ويوم باروده عام
اخوي قدمو سبق الحمام

تغني ليك الفي الشرق
ليك يا الما بتنقرع
ويوم الموت والصرع
سريع الكف للصقع

ياليلة فوق اب دربا قسي

عمر احمد حمزه الكاهلي/الجزيرة/عسير

Omer Ahmed Hamza
08-04-2011, 10:46 PM
بسم الله الرحمن الرحيم

طبل العز ضرب




طبـل العـز ضرب

طبل العــز ضرب يالســرة قومى خلاص
والجنيات هديك فى الساحة ختو الساس
والبنـــوت زغــريـــدن تجيــب الطــــاش
والخـيـل عركسـن والدنـيا بـوق ونحـاس
الـســودان خــلاص يالســرة قـام دواس
شـــد سواعـدوا تانــى وشيـد المتـراس

طـبل العز ضـرب والخيل تسـابق الخيل
مـن اخـــر الجــنوب لعـطــبرة وتوتـيـل
ياشدر الهشـاب قـوم نمشى بـحر النـيل
ويالوز القطــن قـوم تانـى نـور وشيـل
وارقص يانخـيل فـوق السـواقى ومـيل
السودان خلاص دايـر السـمح وعـديل
كسـر قـيده تانــى وقـــام همـيم بلحــيل


طبـل العــز ضـرب حى عليـك ياكفـاح
والاذان نـــده حــى علـيــك ياصــباح
شايـل النـور ومالى بالاغـانى الساح
والظالم وقـع يالســرة داوى جــراح
والشـــارع هجــد مابســوى الـتــاح
خلى الناس تنوم بعد الشقى وترتـاح

عمر احمد حمزه الكاهلي/الجزيرة/عسير

Omer Ahmed Hamza
01-07-2012, 10:21 PM
بسم الله الرحمن الرحيم

الشعر الحماسي
عيال ابو جويلي

تقول الرواية بانه حدث
ان سرقت ناقة "ضئيلة الحجم وهزيلة" لعيال أب جويلي.... ولكن
عيال أب جويلي ولأنهم أشتهروا بالفروسية، مابرضوا الحقارة
فاجتمعوا يناقشوا: ماهم فاعلين بحق ناقتهم التي سلبت منهم
في ظلمة الليل .
فكان الرأي الأغلب ان "يقصوا درب السارق" وأن يستعيدوا ناقتهم
مهما كلف الأمر ومهما سال من دماء.

فاجتمعوا للخروج وراء الناقة، تزغرد لهم النسوة وتدق الطبول، وهم
يؤدون رقصة العرضة على المضارب، معلنين ان أوان خروجهم قد حان ..

وحين كثرت الأهازيج وعلا صوت الزغاريد، أصروا انهم لن يخرجوا وراء
السارق الا حفاة، وأن لا يحملون معهم الا المطارق. "فمن سرق
ناقتهم لا يخرج وراءه بسيف" كناية عن شجاعتهم وشدة بأسهم.

ماسبق كان التحقيق للاحداث حتى خروج عيال أب جويلي الى المضارب:

حقيقة ما حدث بعدها وعودتهم بالناقة اختلفت فيها المصادر
أيضاً وهو تحت التحقيق الآن ولكن أعظم الظن انهم:
عندما تتبعوا أثر الناقة حتى الفاشر مرورا بكردفان وعبورهم لطريق
"درب أب درق" حفاةً، وجدوا ناقتهم ترعى بدون راعي واكتشفوا
انها قد شردت ولم تتم سرقتها "وعادوا بها بدون معركة".... ولكن
رغم ذلك قابلتهم الاحتفالات عند العودة بالنصر الذي حققوه بارجاع
الناقة المسلوبة. فعرضو وكمبلو "بعد ان جابو سمح الخبر"

النص :

عيال اب جويلي الكمبلوا وعرضوا
في دار كردفان اتغربوا وسدروا
ضربوا الجوز عديل حاشا ما ضلوا
لبنات البلد سمح الخبر جابوا


غني و شكري يأم قرقدا سايح
من دار كردفان جانا الشناع فايح
في الفاشر الكبير طلعوا الصايح
دقوا الجوز عديل اصلوا العمر رايح


دقي وزغردي يام قرقدا حسوا
الليله بجيب القول علي البيسوا
عيال اب جويلي الجيلوا و تعلوا
ديل درب اب درق شقوا


غني و شكري يا خدرة الورتاب
فوق ود الفحل الليله جبتا جواب
حقيت الاسم ياسالم الارباب
قيدومة العيال ... ركازة للمرهاب



عمر احمد حمزه الكاهلي/الجزيرة/عسير